अछाममा ३० हजार बढीले राष्ट्रिय परिचयपत्रको लागि विवरण दर्ता गराए

टेकराज भण्डारी, माघ १९, अछाम

अछाम जिल्लामा सञ्चालित राष्ट्रिय परिचय पत्रका लागि विवरण संकलन शिविरमा हालसम्म ३० हजार बढीकाे विवरण दर्ता गरिएको छ ।

हाल जिल्लाका ७ स्थानीय तहमा अभियानका रुपमा संचालन भैरहेको राष्ट्रिय परिचयपत्रका लागि विवरण संकलन गर्ने कार्य अन्तर्गत हालसम्म ३० हजार तीन सय ९४ जनाको विवरण संकलन गरिएको जिल्ला प्रशासन कार्यालयले जनाएको छ । दुई पालिकामा दर्ता कार्य सम्पन्न भैसकेकाे जिल्ला प्रशाशन कार्यालयले जनाएको छ ।

आगामी चैत्र महिना सम्म सम्पूर्ण नागरिकको विवरण संकलन कार्य गरिसक्ने गरी गत पौष २० गतेबाट शिविर सञ्चालन गरिएको हाे ।

जिल्लाको मंगलसेन, कमलबजार र बान्नीगढी जयगढ गाउँपालिकाबाट शुरु गरिएको शिविर हाल रामाराेशन गाउँपालिका, साँफेबगर नगरपालिका र पञ्चदेवल विनायक नगरपालिका र चाैरपाटी गाउँपालिकामा पनि शुरु गरिएको अछामका प्रमुख जिल्ला अधिकारी गाेकर्ण प्रसाद उपाध्यायले जानकारी दिनु भयाे ।

आईतबार सम्म जिल्लाको मंगलसैन नगरपालिकामा ८ हजार छ सय ३० जना, बान्नीगढी जयगढ गाउँपालिकामा ५ हजार २ सय ४७ जनाकाे विवरण संकलन गरि ती दुई पालिकामा दर्ता कार्य सम्पन्न भैसकेकाे प्रमुख जिल्ला अधिकारी उपाध्यायले बताउनुभयो ।

यस्तै कमलबजार नगरपालिकामा ५ हजार ६ सय ५१ जना, साँफेबगर नगरपालिकामा ४ हजार ६ सय ७० जना र पञ्चदेवल विनायक नगरपालिकामा १ हजार ९ सय ७० जना तथा चाैरपाटी गाउँपालिकामा ४ सय ९७ जनाको विवरण संकलन गरिएको प्रमुख जिल्ला अधिकारी उपाध्यायकाे भनाइ छ ।

नागरिकहरुको वैयक्तिक तथा जैविक विवरण समावेश भएको राष्ट्रिय पहिचान सहितको बायोमेट्रिक सुविधायुक्त बहुउपयोगी प्रमाणपत्र राष्ट्रिय परिचय पत्रको रुपमा नेपाल सरकारले सबै नागरिकलाई दिने लक्ष्य राखेको छ ।

अछाम जिल्लामा राष्ट्रिय परिचयपत्रको विवरण संकलनका लागि स्थानीय तहका वडा तहसम्म शिविर सञ्चालन गरिएको छ । शिविर प्रभावकारी भैरहेको स्थानीय तहका जनप्रतिनिधिले समेत बताएका छन् ।

Leave a Reply

Your email address will not be published. Required fields are marked *

सम्बन्धित समाचार

Back to top button

Adblock Detected

Please consider supporting us by disabling your ad blocker