महोत्तरी – महोत्तरीको बर्दिवासमा निषेधाज्ञा लागू भएको छ ।
हिजो प्रहरीको गोली लागेर घाइते भएका बर्दिवास-१ का बुद्धिराज न्यौपानेको ज्यान गएपछि आन्दोलन चर्किएकाले बिहान नौ बजेदेखि लागू हुने गरी निषेधाज्ञा जारी गरेको महोत्तरीका प्रमुख जिल्ला अधिकारी कृष्णबहादुर कटुवालले जानकारी दिनुभयो । बर्दिवासमा थप जनधनको क्षति हुनबाट रोक्न भोलि बिहान ६ बजेसम्मको लागि निषेधाज्ञा जारी गरेको उहाँले बताउनुभयो ।
न्यौपाने हिजो बर्दिवास चोकमा प्रदर्शन गरिरहेकाहरुलाई तितरबितर पार्न प्रहरीले चलाएको गोली लागेर घाइते भएका थिए । तत्काल हेलिकोप्टरबाट काठमाण्डाै लगिएका न्यौपानेको गएराति ज्यान गएको खबर फैलनासाथ बिहानैदेखि प्रदर्शनकारीले राजमार्ग, बजार र सबै व्यापारिक प्रतिष्ठान बन्द गर्दै प्रदर्शन जारी राखेका छन् ।
अर्का घाइते आफताब आलमको बर्दिवासमै उपचार भइरहेको इलाका प्रहरी कार्यालय बर्दिवासका प्रहरी नायब उपरीक्षक राजन चापागाईँले जानकारी दिनुभयो । आइतबार साँझ घर वरिपरिबाटै बेपत्ता भएकी बालिका गुलाबको शव सोमबार भेटिएको थियो ।
हत्याको आरोपमा पक्राउ परेका गौशाला नगरपालिका-५ का अरुण कुमार साहले बालिकाको हत्या गरेको स्वीकारेका प्रहरीले जनाएको छ । स्थानीय बासिन्दाले साहले यसअघि पनि पटक-पटक घटना घटाएको भन्दै आजीवन कैद सजायको माग गर्दै प्रदर्शन गरिरहेका छन् ।
