काठमाण्डाै – सोमबार राति ११ बजेतिर पहिरोले बन्द भएको मुग्लिन–नारायणगढ सडक मंगलबार राति साढे १० बजेतिर खुल्यो । झण्डै २४ घण्टासम्म रोकिएका सबै गाडी पार हुन नपाउँदै फेरि त्यही ठाउँमा पहिरो खस्यो र अहिले फेरि सडक अवरुद्ध भएको छ ।
पहिराेले फेरि बन्द भएपछि डाेजर लगाएर पहिराे पन्छाइँदै
भरतपुर महानगरपालिका २९ मा पर्ने मौरीपुल केराबारीमा पहाडको ढिस्को नै खसेकाले पहिरो पन्छाउन समस्या भएको छ । ‘सोमबार राति बल्लबल्ल सडक खुलाएका थियौं, चारघण्टामै उसैगरी अर्को पहिरो खस्दा सडक अवरुद्ध भयो’ डिभिजन सडक कार्यालय भरतपुरका इञ्जिनियर सागर कार्कीले उज्यालोलाई जानकारी दिनुभयो ।
गएराति चार घण्टा सडक खुल्दा अघिल्लो रातिदेखि रोकिएका सबै गाडी पार हुन पाएनन् । सडक खुलेको बेला धेरै गाडी पार भए, तर सबै पार हुन पाएनन्’ इञ्जिनियर कार्कीले भन्नुभयो, ‘पहिरो खुलेलगत्तै सबै गाडी लेन अनुशासनको वास्तै नगरी तँछाडमछाड गरी चल्दा जाम हुने गरेको छ । पहिरोको जामले भन्दा पनि गाडीको जामले सबै गाडी पार हुन पाएनन् ।’
सडक खुलेपछि लेन अनुशासन पालना गरेर मात्रै गाडी चलाउन उहाँले आग्रह गर्नुभएको छ । ‘फेरि खसेको पहिरो पन्छाउने काम भैरहेको छ, केही घण्टामै सडक खुल्न सक्छ । सडक खुलेको बेला सबै गाडीले लेन अनुशासन पालना गरेमा समस्या हुँदैन’ उहाँले भन्नुभयो ।
काठमाण्डौ उपत्यकालाई देशका मुख्य ठाउँसँग जोड्ने मुग्लिन–नारायणगढ सडक खण्डमा बारम्बार पहिरो खसेर सडक अवरुद्ध हुँदा गाडी चालक, सहचालक र यात्रुको बिचल्ली हुने गरेको छ ।
